Uşaq Səfirlərimizin iştirak etdiyi komandanın möhtəşəm uğuru !

Uşaq Səfirlərimizin iştirak etdiyi komandanın möhtəşəm uğuru !

Uşaq Səfirlər Məclisinin İKT departamentinin direktoru Aşurbəy Məmmədzadənin rəhbərlik etdiyi və həmin departamentin üzvləri Tunar Məmmədli, Nəzrin Bayramlı və Rüfət Əzizzadənin iştirak etdiyi beş nəfərlik “Joshua Tech” komandası “Caspian Agro 2024” sərgisi çərçivəsində Kənd Təsərrüfatı Nazirliyinin Aqrar İnnovasiya Mərkəzinin, Azərbaycan Texniki Universitetinin, “Bilişim Vadisi Bakı Mərkəzi”nin təşkilatçılığı və bir sıra akselerasiya, inkubasiya mərkəzlərinin tərəfdaşlığı ilə keçirilən “GreenAgroHack” hakaton yarışmasında IV yerin sahibi olublar.

“Yaşıl dünya naminə həmrəylik ili” çərçivəsində 15-16 may tarixlərində “Bakı Ekspo” Mərkəzində 29 saat, 29 dəqiqə, 29 saniyə ərzində keçirilən yarışmada ölkənin ali təhsil müəssisələrinin tələbələri və orta məktəblərin şagirdləri iştirak edib.

Startap müsabiqəsinə 19 ali təhsil müəssisəsi və 5 orta məktəbdən iştirakçılar qatılıb. 16 may tarixində yekunlaşan hakaton yarışmasında 4 qalib komanda mükafata layiq görülüb.

Qalib gələn komandalardan “Joshua Tech” komandası “Fermerin dostu” mobil tətbiqini hazırlayıblar. Fermerlərə məsləhət xidmətini özündə ehtiva edən mobil tətbiqi hazırlayan “Joshua Tech” komandası IV yer ilə təltif olunub.