“Heydər Əliyev İli”nə həsr olunmuş “100 ilin lideri” adlı intellektual yarış təşkil edilib.

Ailə, Qadın və Uşaq Problemləri üzrə Dövlət Komitəsi yanında fəaliyyət göstərən Uşaq Səfirlər Məclisinin ümumtəhsil müəssisələri üzrə nümayəndəliyinin fəaliyyət göstərdiyi Heydər Əliyev adına liseydə “Heydər Əliyev İli”nə həsr olunmuş “100 ilin lideri” adlı intellektual yarış təşkil edilib.

Dekabrın 13-də Heydər Əliyev adına liseydə Uşaq Səfirlər Məclisinin məktəb nümayəndələri Zahid İbrahimli və Fatimə Fətəliyevanın təşkilatçılığı ilə “100 ilin lideri” adlı intellektual yarışı keçirilib.

Çıxış edən Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin əməkdaşı Təranə Piriyeva Ümummilli Lider Heydər Əliyevin irsinin öyrənilməsi, təbliği və buna təşviqi istiqamətində keçirilən bu cür tədbirlərin əhəmiyyətinə toxunub. Azərbaycanın müstəqillik və inkişaf tarixində, eyni zamanda dövlət uşaq siyasətinin əsasının qoyulmasında misilsiz xidmətlər göstərmiş Heydər Əliyevin ideyalarının daim yaşayacağını qeyd edib.

Heydər Əliyev adına liseyin təmayül siniflər üzrə direktor müavini Xatirə Məmmədova uşaqlara bu cür təşəbbüskar olduqlarına və nümunəvi fəaliyyətlərinə görə təşəkkürünü bildirib, yarış iştirakçılarına uğurlar arzu edib.

Sonra məktəb nümayəndələri yarış iştirakçılarını şərtlərlə tanış edib, gedişat barədə məlumat veriblər.

Ümummilli Lider Heydər Əliyevin uğurlu siyasətini özündə əks etdirən yarışın sonunda “Liderlər” komandası qalib gəlib və onun üzvləri Aylin Məhərrəmli, Aynur Ələkbərova, Banu Yusifova, Nuranə Hüseynova diplom və hədiyyələrlə təltif ediliblər.